1987 ജനുവരി 14 ന് മാതൃഭൂമിയിൽ പ്രസിദ്ധീകരിച്ച ഒരു വാർത്തയാണിത്. സിപിഐ എം ജനറല് സെക്രട്ടറി ഇ എം എസിന്റെ പ്രസംഗത്തിലേതെന്ന നാട്യത്തില് മാതൃഭൂമി പച്ചക്കള്ളം എഴുതിയതാണിത്. മറ്റൊരു പത്രവും ഇത്തരമൊരു പ്രസംഗം കേട്ടിട്ടുമില്ല, റിപ്പോര്ട്ടുചെയ്തുമില്ല. അടുത്ത ദിവസംതന്നെ ഇഎംഎസിന്റെ മറുപടിയടക്കം ദേശാഭിമാനി വാര്ത്ത പ്രസിദ്ധീകരിച്ചു.
ഇ എം എസ് പറഞ്ഞത്,
ബാബ്റി മസ്ജിദ്, രാമജന്മഭൂമി പ്രശ്നങ്ങള് അന്യോന്യം വിട്ടുവീഴ്ചചെയ്ത് ഒത്തുതീര്പ്പുണ്ടാക്കിക്കൂടേ?
സേട്ടുവും ആര്എസ്എസ്സും തമ്മില് ഇതിന്റെ പേരില് യുദ്ധം വെട്ടാനൊരുങ്ങുകയാണ്. ഇത് രണ്ട് സമുദായത്തിനും ഗുണം ചെയ്യുമോ? രണ്ട് സമുദായങ്ങളിലേയും സാധാരണക്കാര് ചിന്തിക്കണം.
നൂറ്റാണ്ടുകള്ക്കുമുമ്പാണ് ബാബര് ജീവിച്ചത്. ശ്രീരാമന് ജനിച്ചിട്ടുണ്ടെന്നാണ് പറയുന്നതെങ്കില് അതും രണ്ടായിരം മൂവായിരം വര്ഷം മുമ്പാണ്. അന്നുള്ള പ്രശ്നത്തിന്റെ പേരില് ഇന്ന് ജനങ്ങളെ ഇളക്കിവിടുന്നത് ശരിയാണോ?
മതവിശ്വാസികളുടെ വിശ്വാസത്തെ ഞാന് ബഹുമാനിക്കുന്നു. ഞാന് മതവിശ്വാസി അല്ലാത്തതുകൊണ്ട് എനിക്ക് മതവിശ്വാസികളെ ബഹുമാനിക്കാനും വിമര്ശിക്കാനും കഴിയും. ബാബ്റി മസ്ജിദ് പ്രശ്നവും രാമജന്മഭൂമി പ്രശ്നവും പരിഹരിക്കാന് ഞാനൊരു നിര്ദ്ദേശംവെയ്ക്കുന്നു. ഞാനാണ് നിര്ദ്ദേശം വെയ്ക്കുന്നതെന്നതുകൊണ്ട് തന്നെ അവരത് അംഗീകരിക്കുകയില്ല ഇ എം എസ് പറഞ്ഞു.
പള്ളിയും ക്ഷേത്രവും ആ സ്ഥലത്ത് പ്രവര്ത്തിച്ചുകൂടേ? ഒരു ഭാഗത്ത് പള്ളി, മറുഭാഗത്ത് ക്ഷേത്രം. അല്ലെങ്കില് കെട്ടിടത്തിന്റെ മുകളില് പള്ളി, താഴെ ക്ഷേത്രം. അല്ലെങ്കില് മുകളില് ക്ഷേത്രം താഴെ പള്ളി. എന്നാലും തര്ക്കം തീരില്ല. കെട്ടിടത്തിന്റെ താഴെ പള്ളി വേണം, അമ്പലം വേണം എന്നതാവും പിന്നീട് തര്ക്കം. പ്രശ്നം ഒത്തുതീര്പ്പിലെത്തിക്കുകയല്ല കൂടുതല് കുഴപ്പങ്ങളുണ്ടാക്കി സാധാരണ ജനങ്ങളുടെ ജീവിതപ്രശ്നങ്ങളില്നിന്നു ശ്രദ്ധ തിരിച്ചുവിടാനാണ് സേട്ടും ആര്എസ്എസും ശ്രമിക്കുന്നത് ഇ എം എസ് പറഞ്ഞു.
